Gjykata e Posaçme e Apelit për Korrupsionin dhe Krimin e Organizuar ka ndryshuar vendimin e shkallës së parë për pesë ish-zyrtarë të Bashkisë së Tiranës, të përfshirë në dosjen “5D”, duke i lënë ata në shërbim prove.
Vendimi u mor pas shqyrtimit të ankimimeve të Eglantina Zeres, Rivjola Baxhës, Enkelejda Qytës, Bruno Koçit dhe Kristo Zhulatos, të cilët ishin dënuar më herët me nga 6 muaj burg për shkelje të barazisë në tendera, kryer në bashkëpunim.
Apeli ndryshoi dënimin për Eglantina Zeren, ish-drejtuese e autoritetit kontraktor “Tirana Parking”, duke e dënuar me 12 muaj shërbim prove. Po ashtu, asaj i hiqet e drejta për të ushtruar funksione publike për një periudhë 5-vjeçare.
Në të njëjtën mënyrë u trajtuan edhe katër ish-anëtarët e Komisionit të Vlerësimit të Ofertave, Rivjola Baxha, Enkelejda Qyta, Bruno Koçi dhe Kristo Zhulato, të cilët gjithashtu u lanë në shërbim prove për 12 muaj dhe u ndaluan të ushtrojnë funksione publike për 5 vite.
Pesë ish-zyrtarët u shpallën fajtorë për shkelje të barazisë së pjesëmarrësve në tendera apo ankande publike, në kuadër të procedurave të lidhura me aferën “5D”.
