Akuza të reja janë ngritur ndaj Princit Andrew në kuadër të hetimeve dhe debatit të vazhdueshëm mbi marrëdhënien e tij me financierin Jeffrey Epstein.
Sipas një raportimi të BBC, një ish-nëpunës civil britanik ka deklaruar se Andrew ka përdorur fonde publike për të mbuluar shpenzime të konsiderueshme gjatë kohës kur shërbente si i dërguar tregtar i Mbretërisë së Bashkuar, në periudhën 2001–2011.
Ish-nëpunësi, i cili foli në kushte anonimiteti, pretendon se kishte refuzuar të autorizonte pagesën për një masazh të kërkuar nga Andrew, duke e konsideruar të papërshtatshëm përdorimin e fondeve publike për këtë qëllim. Megjithatë, sipas tij, pagesa u miratua nga eprorë të tjerë.
Ai shtoi se ishte përballur disa herë me kërkesa për rimbursime në mijëra paundë, të cilat përfshinin fluturime, akomodime në hotele dhe shpenzime të stafit shoqërues, pa qenë gjithmonë e qartë sa persona e shoqëronin dhe në çfarë cilësie.
Një burim i dytë i cituar nga BBC tha se kishte parë personalisht kërkesat për rimbursime dhe se nuk kishte “asnjë dyshim” për vërtetësinë e pretendimeve.
Ndërkohë, thirrjet për një hetim më të gjerë mbi veprimtarinë e kaluar të Andrew janë shtuar. Ai ka mohuar çdo shkelje, por nuk ka reaguar drejtpërdrejt ndaj akuzave më të fundit.
