Kryeministri Edi Rama ka reaguar për protestat që prej një muaji po zhvillohen çdo ditë në Tiranë, ku pjesëmarrësit kërkojnë dorëheqjen e tij dhe të qeverisë.
Përmes një postimi në rrjetet sociale, Rama bëri dallim mes qytetarëve që, sipas tij, protestojnë për shqetësime reale dhe organizatorëve të protestës, të cilët i cilësoi si “mbetje të rrezikshme socio-politike” dhe “shembëlltyra më e zezë e alternativave politike të këtyre 35 viteve”.
Kreu i qeverisë theksoi se qytetarët kanë të drejtë të protestojnë, pavarësisht se kush i organizon apo i drejton tubimet, ndërsa shtoi se qeveria do të reflektojë mbi shqetësimet e tyre.
“Qytetarët kanë të drejtë të protestojnë, pavarësisht se kush i drejton, manipulon, përdor dhe abuzon me hallet e tyre. Korja e mbetjeve të rrezikshme socio-politike të bulevardit dhe uji i rrjedhshëm i protestës së qytetarëve që kërkojnë të dëgjohen janë dy gjëra krejt të ndryshme”, shkruan Rama.
Sipas tij, pakënaqësitë e qytetarëve do të shërbejnë si një nxitje për përmirësimin e qeverisjes dhe realizimin e objektivit për anëtarësimin e Shqipërisë në Bashkimin Europian deri në vitin 2030.
Në përfundim të reagimit, Rama shprehet se shumica qeverisëse do të dalë “më afër me popullin”, ndërsa akuzon organizatorët e protestave se po keqpërdorin qytetarët për interesa politike.
