Elisa Spiropali ka reaguar përmes një postimi në rrjetet sociale lidhur me zhvillimet e fundit politike dhe debatet brenda Partia Socialiste, duke theksuar nevojën për reforma të brendshme dhe rigjallërim të forcës qeverisëse.
Në mesazhin e saj, Spiropali foli për një “Marrëveshje të Re për Shqipërinë”, duke argumentuar se vendi ka nevojë për institucione më të hapura, më të drejta, më meritokratike dhe më pranë standardeve europiane.
Ajo theksoi se për të arritur këtë objektiv, Partia Socialiste duhet të ndërmarrë një proces reflektimi dhe reformimi të brendshëm.
“Partisë Socialiste i duhet të gjejë forcat, të mbledhë mendjen, të vetëpastrohet, të bëhet më dinamike, më demokratike, më kompakte, për të mbetur gjithmonë e re, gjithmonë e pastër”, shkroi Spiropali.
Reagimi i saj vjen një ditë pas mbledhjes së grupit parlamentar socialist, ku Kryeministri Edi Rama komentoi idenë e një “Shqipërie të Re”, duke ironizuar disa prej kritikëve brenda dhe jashtë partisë.
Disa media dhe analistë e kanë interpretuar postimin e Spiropalit si një përgjigje indirekte ndaj deklaratave të Ramës dhe si një thirrje për më shumë reflektim brenda shumicës qeverisëse. Megjithatë, në reagimin e saj nuk përmenden emra konkretë dhe as akuza të drejtpërdrejta ndaj drejtuesve të partisë apo anëtarëve të qeverisë.
Në postim, Spiropali thekson se ndryshimi i vendit duhet të nisë nga transformimi i vetë forcës politike që qeveris.
“Ta bëjmë Marrëveshjen e Re të madhe, të thellë, të vërtetë, duke pasur parasysh se po nuk lartësuam veten, nuk mund ta përmirësojmë vendin”, shprehet ajo.
Deklarata ka nxitur diskutime në ambientin politik mbi drejtimin e Partisë Socialiste dhe sfidat me të cilat përballet shumica qeverisëse në një moment të tensionuar të debatit publik.
