Deputeti i Partisë Demokratike, Klevis Balliu, ka reaguar pas aktivitetit të zhvilluar nga Partia Socialiste dhe kryeministri Edi Rama, duke pretenduar se një pjesë e administratës publike, e pranishme në takim, iu bashkua më pas protestës qytetare kundër qeverisë.
Përmes një reagimi publik, Balliu e cilësoi situatën si një “perlë”, duke ironizuar faktin që, sipas tij, punonjësit e administratës që kishin marrë pjesë në aktivitetin e organizuar nga mazhoranca, u bashkuan më vonë me protestuesit në rrugët e Tiranës.
“Perlë! Pas takimit me Ramën, administrata që ishte e detyruar të rrinte dhe ta dëgjonte, sapo ai u largua, iu bashkua të rinjve dhe të rejave që protestonin kundër shokut Edvin”, deklaroi Balliu.
Deklarata e deputetit demokrat vjen në një kohë kur protestat kundër qeverisë kanë hyrë në ditën e 14-të, me organizatorët që pretendojnë se pjesëmarrja qytetare po rritet nga dita në ditë.
Nga ana tjetër, mazhoranca dhe kryeministri Edi Rama kanë hedhur poshtë akuzat e opozitës, duke argumentuar se protestat janë pjesë e normalitetit demokratik dhe se qeveria do të vijojë zbatimin e programit për të cilin është votuar nga qytetarët.
Ndërkohë, protesta e radhës është paralajmëruar të zhvillohet sërish këtë mbrëmje në Tiranë, nën moton “Bashkë për ndryshim”, me kërkesën kryesore për dorëheqjen e kryeministrit Edi Rama.
