Prokuroria e Posaçme Kundër Korrupsionit dhe Krimit të Organizuar (SPAK) ka zgjeruar hetimet ndaj Belinda Ballukut, duke shtuar dyshime për veprat penale të korrupsionit pasiv dhe pastrimit të produkteve të veprës penale. Zhvillimi vjen pas sekuestrimit të një pasurie në Dhërmi, për të cilën organi i akuzës pretendon se lidhet me një përfitim të parregullt në këmbim të favorizimit të një operatori ekonomik në një procedurë prokurimi të zhvilluar vite më parë nga Albcontrol.
Sipas SPAK, hetimet kanë evidentuar elementë të rinj që, sipas prokurorëve, kërkojnë thellimin e procedurës penale. Burime pranë çështjes bëjnë me dije se institucioni mund t’i drejtohet sërish Kuvendit të Shqipërisë për një autorizim të ri, në rast se do të vlerësohet e nevojshme marrja e masave të mëtejshme procedurale ndaj deputetes socialiste.
Në qendër të hetimit ndodhet një vilë në resortin “White Rocks” në Dhërmi. Sipas SPAK, ekzistojnë dyshime se prona është përfituar si shpërblim në këmbim të favorizimit të një kompanie në një tender publik. Prokuroria pretendon se janë përdorur veprime juridike të dyshuara si fiktive për të fshehur pronësinë reale të pasurisë.
Çështja ka rikthyer debatin politik edhe në Kuvend. Përfaqësues të opozitës kanë kërkuar që SPAK të vijojë pa pengesa hetimet dhe që çdo kërkesë e re e organit të akuzës të trajtohet në përputhje me ligjin. Nga ana tjetër, përfaqësues të mazhorancës kanë theksuar se çdo person konsiderohet i pafajshëm deri në një vendim të formës së prerë të gjykatës.
SPAK ka bërë të ditur se hetimet vijojnë për dokumentimin e plotë të fakteve, identifikimin e personave të tjerë të përfshirë dhe përcaktimin e përgjegjësive eventuale penale. Ndërkohë, vetë Balluku dhe personat e përmendur në dosje kanë kundërshtuar akuzat, duke deklaruar se veprimet e tyre janë kryer në përputhje me ligjin.
EuroAlbania
