Qytetarë dhe aktivistë pritet të mblidhen edhe këtë mbrëmje përpara Kryeministrisë në Tiranë, në protestën e tretë radhazi kundër projektit turistik që parashikohet të zhvillohet në zonën e Zvërnecit.
Tubimi është paralajmëruar të nisë në orën 18:00 dhe vjen pas dy protestave të njëpasnjëshme që kanë sjellë në qendër të debatit publik çështjen e zhvillimit të projektit në një zonë që konsiderohet me rëndësi të veçantë mjedisore.
Organizatorët dhe pjesëmarrësit kundërshtojnë ndërtimin në Zvërnec, duke argumentuar se projekti prek një zonë të mbrojtur dhe rrezikon ekuilibrin mjedisor të rajonit. Ata kërkojnë anulimin e investimit dhe transparencë të plotë mbi procedurat e ndjekura për zhvillimin e tij.
Një ditë më parë, mijëra qytetarë marshuan nga zona pranë Ministrisë së Brendshme drejt Bulevardit “Dëshmorët e Kombit”, ku zhvilluan protestën e tyre para godinës së qeverisë. Në përfundim të tubimit, pjesëmarrësit përcollën mesazhin “Nesër më shumë”, duke paralajmëruar vijimin e mobilizimit qytetar.
Protestuesit pretendojnë se projekti favorizon interesa private në dëm të interesit publik dhe kanë ngritur shqetësime lidhur me çështjet e pronësisë, mbrojtjen e natyrës dhe mënyrën e menaxhimit të territorit në zonën e Zvërnecit.
Tensionet janë shtuar pas ngjarjeve të raportuara gjatë protestës së zhvilluar në Zvërnec, ku pati përplasje mes protestuesve dhe punonjësve të sigurisë private. Pamjet e një qytetari të tërhequr me forcë gjatë incidentit shkaktuan reagime të forta publike dhe politike.
Përveç kërkesës për anulimin e projektit, gjatë protestave të fundit janë artikuluar edhe thirrje politike kundër qeverisë dhe kërkesa për dorëheqjen e kryeministrit Edi Rama.
Ndërkohë, qeveria ka mbrojtur projektin, duke argumentuar se bëhet fjalë për një investim strategjik që synon zhvillimin ekonomik dhe turistik të zonës, ndërsa kundërshtarët e tij paralajmërojnë se protestat do të vazhdojnë deri në tërheqjen e plotë të projektit.
