Kryetari i Parlamentit iranian dhe një nga figurat kyçe në proceset negociuese të Teheranit, Mohammad Bagher Ghalibaf, ka deklaruar se Republika Islamike siguron lëshime nga kundërshtarët e saj përmes forcës ushtarake dhe jo përmes negociatave.
Në një reagim të publikuar në rrjetin social X, Ghalibaf u shpreh se raketat dhe aftësitë mbrojtëse të Iranit janë faktori kryesor që detyrojnë palët e tjera të bëjnë lëshime.
“Ne sigurojmë lëshime jo përmes bisedimeve, por përmes raketave; negociatat shërbejnë thjesht për t’i përcjellë ato. Nuk kemi besim te garancitë apo fjalët, vetëm veprimet kanë rëndësi”, deklaroi ai.
Deklaratat vijnë në një moment kur raportime të ndryshme ndërkombëtare flasin për përparim në kontaktet mes Iranit dhe Shteteve të Bashkuara, me qëllim formalizimin e një armëpushimi dhe hapjen e plotë të Ngushticës së Hormuzit.
Sipas burimeve të cituara nga mediat ndërkombëtare, administrata e presidentit amerikan Donald Trump po shqyrton draftin e fundit të një marrëveshjeje të mundshme me Iranin. Megjithatë, vendimi final pritet të merret vetëm pasi të konfirmohet miratimi nga udhëheqja e lartë iraniane.
Ghalibaf theksoi se Teherani nuk do të ndërmarrë hapa të mëtejshëm pa veprime konkrete nga pala amerikane, duke shtuar se gatishmëria ushtarake mbetet elementi më i rëndësishëm në çdo marrëveshje.
“Fituesi i çdo marrëveshjeje është pala që është më e përgatitur për luftë një ditë pas nënshkrimit të saj”, u shpreh ai.
Sipas raportimeve, dokumenti aktual synon të zgjasë me 60 ditë armëpushimin ekzistues, ndërsa negociatat mbeten në një fazë delikate dhe nën presion të zhvillimeve të fundit në rajon.
