Mark Rutte ka deklaruar se NATO duhet të vazhdojë të zvogëlojë varësinë e saj nga Shtetet e Bashkuara, duke nxitur një rol më të madh të vendeve europiane në mbrojtjen dhe sigurinë e aleancës.
Deklarata u bë përpara takimit të ministrave të jashtëm të NATO-s në Helsingborg, ku në fokus pritet të jenë lufta në Lindjen e Mesme, tensionet me Iranin dhe strategjia e ardhshme e aleancës.
Sipas raportimit të Sky News, Rutte theksoi se NATO po ecën drejt një “Europe më të fortë dhe një NATO-je më të fortë”.
“Trajektorja në të cilën po shkojmë është një Evropë më e fortë dhe një NATO më e fortë, duke u siguruar që me kalimin e kohës do të jemi më pak të varur vetëm nga një aleat, siç kemi qenë për kaq kohë, që janë SHBA-të”, deklaroi ai.
Në të njëjtin takim pritet të marrë pjesë edhe Marco Rubio, i cili do të kërkojë nga vendet anëtare një “ndarje më të madhe të barrës” financiare dhe ushtarake brenda aleancës.
Rutte shtoi se një Evropë më e aftë ushtarakisht do t’i lejonte SHBA-ve të fokusoheshin më shumë në prioritete të tjera strategjike globale, duke theksuar se kjo mbetet edhe në interes të vetë aleatëve europianë.
Takimi i ministrave të jashtëm zhvillohet në një moment tensionesh të larta ndërkombëtare dhe debatesh të vazhdueshme mbi rolin e SHBA-ve në sigurinë europiane.
