Deputeti i Partia Demokratike, Saimir Korreshi, ka mbajtur një fjalim të ashpër në Kuvend gjatë interpelancës me ministren e Shëndetësisë Evis Sala, duke denoncuar gjendjen që ai e cilësoi dramatike në spitalin e Lushnjë.
Korreshi akuzoi institucionet shëndetësore për neglizhencë dhe mungesë të kushteve bazë për pacientët, duke deklaruar se në spital mungojnë pajisje funksionale dhe kushtet higjienike janë të degraduara.
“Në Lushnje të hanë minjtë, është batërdi, ka rënë çdo mur. Si shikoheni në pasqyrë? Keni të bëni me jetë njerëzish”, u shpreh deputeti demokrat.
Ai ngriti shqetësime edhe për mungesën e shërbimeve të specializuara, duke pretenduar se për muaj të tërë nuk ka funksionuar shërbimi i anestezisë dhe se dhjetëra pacientë detyrohen të dalin jashtë qytetit për të kryer dializën.
Sipas Korreshit, një pacient prej 57 ditësh nuk kishte frigorifer për ruajtjen e insulinës dhe detyrohej të blinte vetë pajisjet e nevojshme.
Deputeti solli edhe një rast personal, duke treguar se kishte humbur një familjare për shkak të mungesës së diagnostikimit në kohë.
“Kam pasur një humbje të madhe, për një eko vdiq. Po të ishte konstatuar në kohë, do kishte shpëtuar”, deklaroi ai.
Debati në Kuvend u zhvillua në kuadër të interpelancës së kërkuar nga opozita për situatën në sistemin shëndetësor dhe kushtet në spitalet rajonale.
