Kreu i Partisë Demokratike, Sali Berisha, ka komentuar votimin e përbashkët të PD-së dhe PS-së për projektrezolutën mbi integrimin europian të Shqipërisë, duke theksuar se opozita mbështet procesin e anëtarësimit në Bashkimin Europian.
Në një komunikim me qytetarët në rrjetet sociale, Berisha deklaroi se Partia Demokratike mbetet pro integrimit europian, por sipas tij Shqipëria aktualisht nuk përmbush kriteret e kërkuara, me përjashtim të faktorit gjeopolitik.
“Ne, duke thënë të vërtetën, themi se jemi dakord për integrimin, por përveç gjeopolitikës nuk plotësojmë asnjë kriter,” u shpreh Sali Berisha.
Ai tha se rezoluta e miratuar në Kuvend nuk përmban vlerësime për punën e qeverisë apo parlamentit, por vetëm kërkesa dhe detyra për institucionet shqiptare.
Sipas Berishës, pas zhvillimeve gjeopolitike të viteve të fundit, veçanërisht pas luftës në Ukrainë, në Bashkimin Europian është krijuar bindja se vendet e Ballkanit Perëndimor duhet të afrohen më shpejt me BE-në.
Megjithatë, ai theksoi se Partia Demokratike vazhdon të mbrojë parimin e integrimit të bazuar në meritë dhe performancë.
“Nëse lexoni rezolutën, nga rreshti i parë deri te i fundit nuk gjeni absolutisht asnjë vlerësim për punën e parlamentit apo të qeverisë. Zero,” deklaroi kreu i PD-së.
Sali Berisha shtoi gjithashtu se nëse Shqipëria do të kishte mundësinë të anëtarësohej në Bashkimin Europian në një afat të afërt, opozita nuk do ta kundërshtonte këtë proces, pasi sipas tij integrimi europian është një çështje kombëtare dhe jo partiake.
“Ne nuk do të votonim kundër, sepse kjo nuk është çështje e luftës ndërpartiake, por çështje e kombit,” tha ai.
