Ministri i Infrastrukturës dhe Energjisë, Enea Karakaçi, mori pjesë në Athinë në konferencën ndërkombëtare të energjisë të organizuar nga Financial Times, ku diskutoi me homologë rajonalë mbi bashkëpunimin energjetik dhe projektet e interkonjeksionit në Ballkan.
Gjatë aktivitetit, Karakaçi zhvilloi edhe një takim dypalësh me ministrin grek të Energjisë, ku u diskutua projekti i linjës së dytë të interkonjeksionit Shqipëri–Greqi, si dhe bashkëpunimi mes bursës shqiptare të energjisë dhe bursës greke.
Në deklaratat e tij, Karakaçi theksoi rëndësinë strategjike të lidhjeve rajonale energjetike, sidomos në kushtet e rritjes së prodhimit nga burimet e rinovueshme në Shqipëri.
Por zhvillimi ka nxitur reagime politike dhe akuza ndaj ish-zv/kryeministres Belinda Balluku, e cila sipas kritikëve vazhdon të ndikojë në politikat energjetike përmes bashkëpunëtorëve të saj politikë dhe institucionalë.
Në artikullin me tone akuzuese, pretendohet se Balluku ka ndërtuar gjatë viteve një rrjet bashkëpunimi me kompani dhe interesa energjetike greke, përfshirë projekte që lidhen me interkonjeksionin energjetik, bursën e energjisë dhe investime infrastrukturore.
Po ashtu përmenden kompani si AKTOR dhe DEPA, si pjesë e bashkëpunimeve rajonale në sektorin energjetik.
Artikulli pretendon gjithashtu se SPAK po verifikon procedura që lidhen me tenderë energjetikë, projekte infrastrukturore dhe marrëveshje ndërkufitare, përfshirë projektin e interkonjeksionit Shqipëri–Greqi dhe bashkëpunimin mes bursave energjetike.
Mes projekteve të përmendura janë edhe Tuneli i Llogarasë, terminali energjetik i Vlorës, TEC-i me gaz dhe projekte të energjisë diellore.
Në shkrim pretendohet gjithashtu se hetimet kanë përfshirë kontrolle dhe sekuestrime dokumentesh e pajisjesh elektronike për të verifikuar procedurat dhe komunikimet zyrtare që lidhen me projektet energjetike dhe infrastrukturore.
Një tjetër projekt i përmendur është Porti i Limionit në Sarandë, ku sipas artikullit po verifikohen procedura koncesionare dhe lidhje të mundshme me interesa biznesi.
Artikulli e paraqet situatën si pjesë të një debati më të gjerë mbi varësinë energjetike të Shqipërisë nga kapitali i huaj dhe mungesën e një strategjie të pavarur prodhuese në sektorin energjetik.
