Kryetari i Partia Demokratike, Sali Berisha, ka kundërshtuar raportin e qeverisë për procesin e integrimit të Shqipërisë në Bashkimi Europian, duke kërkuar që dokumenti të lexohet i plotë në Kuvend.
Gjatë fjalës së tij në seancën parlamentare, Berisha deklaroi se raporti përmban “mashtrime dhe burokraci” dhe akuzoi qeverinë se po përpiqet t’u fshehë qytetarëve realitetin e procesit të integrimit.
“Keni paraqitur raportin mbi integrimin në BE, i cili nga alfa te omega është mashtrim dhe vetëm mashtrim,” u shpreh Berisha.
Sipas tij, qeveria nuk po lejon leximin e raportit në Kuvend pikërisht për të shmangur debatin publik mbi përmbajtjen e tij.
“Ky është një akt i rëndë në një moment shumë të rëndësishëm për shqiptarët. Ju paraqisni një raport që nuk guxoni ta lexoni dhe vendosni që raporti të mos lexohet që qytetarët të mos njihen me mashtrimet tuaja,” tha kreu demokrat.
Sali Berisha kërkoi tërheqjen e menjëhershme të raportit dhe zhvillimin e një debati parlamentar mbi dokumentin, përpara miratimit të çdo rezolute.
Ai hodhi akuza edhe ndaj kryeministrit Edi Rama dhe ish-zv.kryeministres Belinda Balluku, duke pretenduar se problematikat e qeverisë po errësojnë performancën e vendit në raport me integrimin europian.
Debati për raportin vjen në një moment kur procesi i negociatave të Shqipërisë me Bashkimi Europian është kthyer në një nga temat kryesore të përplasjes politike mes mazhorancës dhe opozitës.
