Ish-kryeministri i Maqedonisë së Veriut, Nikolla Gruevski, ka reaguar publikisht pas sinjaleve për nisjen e procedurave të mundshme për ekstradimin e tij, duke hedhur akuza të forta për ndjekje politike dhe procese të padrejta gjyqësore.
Përmes një postimi në rrjetet sociale, Gruevski kritikoi Ministrinë e Drejtësisë në Shkup, duke shprehur pakënaqësi për fokusin që, sipas tij, po i jepet vetëm çështjes së tij, ndërsa anashkalohen shkeljet e pretenduara gjatë qeverisjes së mëparshme.
Ai i bëri thirrje autoriteteve që, krahas procedurave për ekstradim, të hetojnë edhe atë që e cilëson si “ndjekje politike” gjatë periudhës kur në pushtet ishte Zoran Zaev.
Sipas Gruevskit, në atë periudhë janë zhvilluar procese gjyqësore të montuara, me lista të personave që duhej të ndiqeshin penalisht dhe me dëshmitarë të detyruar, përmes presioneve dhe kërcënimeve, të japin deklarata të rreme.
Ai pretendon gjithashtu se vendimet gjyqësore ndaj tij janë marrë mbi baza të dobëta provash dhe nën ndikim politik, duke përmendur disa çështje konkrete për të cilat është dënuar, si blerja e një automjeti të blinduar, prona të paluajtshme apo akuza për dhunë, të cilat ai i konsideron të pabazuara.
Gruevski thekson se edhe gjyqtarët, sipas tij, kanë qenë nën presion politik në atë kohë, ndërsa i kërkon ministrit të Drejtësisë të verifikojë këto pretendime përpara se të ndërmarrë hapa të mëtejshëm ligjorë ndaj tij.
Në fund, ish-kryeministri paralajmëroi se e gjithë kjo situatë, sipas tij, do të dalë në dritë edhe në institucionet europiane, duke e cilësuar çështjen si një problem më të gjerë të sistemit të drejtësisë në vend.
Çështja e ekstradimit të Nikolla Gruevski mbetet ende e hapur, ndërsa reagimi i tij pritet të shtojë tensionet politike dhe debatet mbi drejtësinë në Maqedoninë e Veriut.
