Tirana pritet të përjetojë një nga eventet më të mëdha muzikore në historinë e saj, pasi Kanye West do të performojë më 11 korrik në një koncert madhështor me përmasa ndërkombëtare.
Për këtë event, organizatorët kanë planifikuar ndërtimin e një stadiumi të përkohshëm, të quajtur “Eagle Stadium”, me kapacitet rreth 60 mijë spektatorë. Struktura do të ngrihet në zonën e Kasharit, në aksin Tiranë–Durrës, një vendndodhje strategjike për shkak të afërsisë me Aeroporti Ndërkombëtar i Tiranës dhe lidhjes me rrugët kryesore.
Ky koncert konsiderohet si një ngjarje e paprecedentë për Shqipërinë. Parashikohet që rreth 100 mijë vizitorë të mbërrijnë në kryeqytet për eventin, ndërsa ndikimi ekonomik mund të arrijë deri në 120 milionë euro, duke përfshirë turizmin, shërbimet dhe bizneset lokale.
Performanca në Tiranë është pjesë e turit botëror të vitit 2026 të artistit amerikan, i cili do të përfshijë ndalesa në SHBA, Azi dhe Europë. Përfshirja e Shqipërisë në këtë tur shihet si një moment i rëndësishëm për promovimin e vendit në hartën e eventeve globale.
Organizimi i koncertit është marrë përsipër nga kompania “Streetlife”, e njohur për evente të mëdha ndërkombëtare dhe bashkëpunime me artistë si 50 Cent, Drake dhe Snoop Dogg.
I njohur për ndikimin e tij në muzikë dhe kulturën moderne, Kanye West ka lënë gjurmë me albume si “The College Dropout”, “Graduation”, “808s & Heartbreak” dhe “Donda”. Koncerti në Tiranë pritet të jetë jo vetëm një spektakël muzikor, por edhe një provë e rëndësishme për kapacitetin e vendit në organizimin e eventeve të mëdha ndërkombëtare.
