Një debat i ashpër është zhvilluar në studio televizive mes gazetares Klodiana Lala dhe analistit Ermir Gjinishi, lidhur me trajtimin e ish-presidentit Ilir Meta gjatë procesit gjyqësor dhe qëndrimit të tij në paraburgim.
Diskutimi u përqendrua te vendosja e Metës në kafazin e xhamit në sallën e gjyqit, si dhe kushtet e raportuara në qeli. Gjinishi ngriti shqetësime për trajtim denigrues, duke përmendur mungesën e kushteve minimale, si ndriçimi në ambientet sanitare.
“Këto janë denigrime… nuk bëhet kështu drejtësia,” u shpreh ai, duke shtuar se çështja nuk lidhet me individin, por me standardet që duhet të vlejnë për çdo qytetar.
Nga ana tjetër, Lala theksoi se mbyllja e seancave për publikun lidhet me mbrojtjen e dëshmitarëve dhe procedurat ligjore, ndërsa pranoi se personalisht ka qenë kundër përdorimit të kafazit në gjyqe, por shtoi se ky fenomen nuk është i ri dhe nuk ka prekur vetëm figura politike.
Debati u tensionua më tej kur Gjinishi akuzoi për standarde të dyfishta në trajtimin e të pandehurve, duke krahasuar rastin e Metës me figura të tjera publike. Ai ngriti pikëpyetje edhe mbi transparencën e procesit, duke kritikuar vendimin për të mos lejuar transmetimin e seancave.
Në kundërpërgjigje, Lala solli shembuj të rasteve të tjera të vështira në sistemin penitenciar, duke theksuar se problematikat nuk janë të kufizuara vetëm në një rast të vetëm.
Debati pasqyron tensionin e lartë publik dhe politik rreth proceseve gjyqësore ndaj figurave të larta, si dhe ndjeshmërinë për standardet e drejtësisë dhe trajtimin e të paraburgosurve në Shqipëri.
