Kriza në sektorin bujqësor po thellohet në Malësia e Madhe, ku fermerët përballen me rënie të çmimeve dhe mungesë mbështetjeje nga shteti.
Një prej tyre është Martin Markvukaj, banor i fshatit Zagorë, i cili pas emigrimit në Itali u kthye në Shqipëri për të investuar kursimet e tij në kultivimin e sherebelës. Ai tregon se çmimi i këtij produkti ka pësuar një rënie të ndjeshme ndër vite, duke e bërë gjithnjë e më të vështirë vijimin e aktivitetit bujqësor.
Sipas tij, kur nisi investimin, sherebela shitej me rreth 160–170 lekë për kilogram, ndërsa më pas çmimi ra në 100 lekë, më pas në 70 lekë dhe aktualisht luhatet rreth 100 lekë për kilogram, pa garantuar fitim të qëndrueshëm.
Fermeri ngre shqetësimin se subvencionet janë të pamjaftueshme dhe nuk arrijnë gjithmonë tek përfituesit e duhur. Ai pretendon se shpërndarja e mbështetjes shpesh bëhet në mënyrë selektive, duke lënë jashtë shumë fermerë që kanë nevojë reale për ndihmë.
Përveç problemeve ekonomike, Markvukaj thekson edhe mungesën e kushteve bazë në zonë, si energjia elektrike dhe uji i pijshëm. Sipas tij, ndërprerjet e energjisë zgjasin me ditë gjatë dimrit, ndërsa në verë mungon uji, duke detyruar banorët të përshkojnë distanca për t’u furnizuar.
Ai shton se këto vështirësi kanë ndikuar drejtpërdrejt në shpopullimin e zonës, ku shumica e banorëve janë larguar drejt emigrimit dhe bujqësia mbetet burimi i vetëm i të ardhurave për ata që kanë mbetur.
Në përfundim, fermeri apelon për më shumë mbështetje konkrete dhe politika efektive, duke theksuar se pa subvencione reale dhe përmirësim të kushteve, e ardhmja e bujqësisë në zonë mbetet e pasigurt.
