Fotoreporteri Felix Bilani ka denoncuar një incident të rëndë gjatë mbulimit të protestave të opozitës, duke deklaruar se është goditur me spray djegës nga policia, pavarësisht se ishte identifikuar si gazetar në detyrë.
Gjatë një interviste televizive, ai tregoi se situata u përshkallëzua në momentin kur po filmonte protestën, ndërsa u shty nga efektivët me mburojë dhe shkop, duke i rënë edhe telefoni nga dora. Sipas tij, pasi u afrua për të treguar bexhin dhe për të sqaruar se ishte gazetar, një efektiv e goditi drejtpërdrejt në sy me spray.
Bilani shtoi se i njëjti veprim ndodhi edhe ndaj kolegut të tij, Aulon Kalaja, vetëm pak sekonda më pas. Ai theksoi se këto nuk janë raste të izoluara, por pjesë e një modeli të përsëritur, ku gazetarët janë vënë në shënjestër gjatë protestave.
Sipas dëshmisë së tij, në protesta të mëparshme policia ka përdorur gaz lotsjellës në zonat ku ndodheshin gazetarët, si dhe topa uji për t’i shpërndarë, edhe kur nuk kishte protestues pranë tyre. Ai pretendon se këto veprime synojnë të pengojnë raportimin dhe të ushtrojnë presion ndaj medias.
Bilani e cilësoi situatën si shqetësuese për lirinë e medias, duke ngritur pikëpyetje mbi mënyrën e ndërhyrjes së forcave të rendit dhe trajtimin e gazetarëve gjatë protestave në vend.
