Media spanjolle ABC (Spain) i ka kushtuar vëmendje protestës së zhvilluar në Tiranë, duke theksuar kërkesën e protestuesve për dorëheqjen e kryeministrit Edi Rama.
Në artikullin e saj, ABC raporton se qytetarët dolën në rrugë për të kundërshtuar qeverisjen, duke e akuzuar kryeministrin për veprime që, sipas tyre, cenojnë sundimin e ligjit dhe standardet demokratike në vend.
Sipas medias spanjolle, tensionet u rritën pas përfundimit të fjalimit të liderit të opozitës, Sali Berisha, moment pas të cilit situata degradoi në përplasje mes protestuesve dhe forcave të rendit.
Raportimi nënvizon se ndërhyrja e policisë u shoqërua me përdorim force për shpërndarjen e turmës, ndërsa ngjarjet në terren reflektuan një përshkallëzim të situatës politike në kryeqytet.
Pasqyrimi nga ABC është një tjetër tregues se zhvillimet në Shqipëri po ndiqen nga afër nga mediat ndërkombëtare, të cilat po evidentojnë tensionet politike dhe përplasjet mes opozitës dhe qeverisë.
