Zëvendëspresidentja e Partia e Lirisë, Erisa Xhixho, ka reaguar ashpër ndaj rritjes së çmimeve në vend, duke e cilësuar situatën si alarmante për ekonominë familjare.
Gjatë një interviste televizive, ajo u shpreh se rritja e çmimeve të karburanteve dhe produkteve bazë ka arritur nivele të papërballueshme, duke rënduar ndjeshëm mbi qytetarët.
Sipas saj, çmimi i naftës ka arritur në rreth 224 lekë për litër, ndërsa rreth 60% e këtij çmimi përbëhet nga taksa. Ajo argumentoi se ndërhyrjet e qeverisë, si ulja e pjesshme e akcizës, kanë pasur efekt minimal dhe nuk kanë sjellë lehtësim real.
Xhixho theksoi se rritja e çmimit të naftës ka sjellë një efekt zinxhir në ekonomi, duke ndikuar në rritjen e çmimeve të ushqimeve dhe kostove të transportit.
“Çmimet kanë shkuar në stratosferë, ndërsa qytetarët mezi mbyllin muajin,” u shpreh ajo.
Deputetja kritikoi gjithashtu politikat në bujqësi, duke përmendur heqjen e skemës së naftës falas për fermerët, që sipas saj ka rritur më tej kostot e prodhimit në një kohë kur edhe çmimet e plehrave kimike janë rritur ndjeshëm.
Ajo akuzoi qeverinë se po përfiton nga rritja e çmimeve përmes të ardhurave më të larta nga TVSH dhe taksat, ndërsa nuk ndërmerr masa për të ndihmuar qytetarët.
Në këtë kuadër, Xhixho paraqiti disa propozime të opozitës, duke përfshirë:
- pezullimin e taksës së qarkullimit dhe të karbonit për karburantet
- uljen e TVSH-së për produktet bazë nga 20% në 5%
- masa për të kontrolluar spekulimet në treg
Sipas saj, një qeveri e përgjegjshme duhet t’i rikthejë qytetarëve të ardhurat shtesë që mbledh gjatë krizave.
“Qeveria po mbush arkën e shtetit në kurriz të qytetarëve,” përfundoi ajo.
