Një investigim i publikuar nga The Sun ka nxjerrë në pah shifra shqetësuese lidhur me numrin e shtetasve shqiptarë që dënohen në Mbretëria e Bashkuar.
Sipas të dhënave të Ministria e Drejtësisë së Mbretërisë së Bashkuar, gjatë një viti deri në shtatorin e kaluar, 1,865 shqiptarë janë dënuar me burg, çka përkthehet mesatarisht në rreth pesë persona në ditë.
Shqiptarët përbëjnë gjithashtu përqindjen më të lartë të të huajve në burgjet britanike, rreth 9% të totalit prej mbi 75 mijë të burgosurish aktualë. Vetëm gjatë tre muajve të parë të këtij viti, 58 shtetas shqiptarë janë dënuar me të paktën një vit burg për vepra të ndryshme penale, nga trafikimi i drogës deri te trafikimi i qenieve njerëzore.
Sipas legjislacionit britanik, çdo i huaj që dënohet me 12 muaj burg ose më shumë përballet automatikisht me urdhër deportimi pas përfundimit të dënimit.
Ndërkohë, ndryshime të reja ligjore të propozuara nga Partia Laburiste synojnë të përshpejtojnë deportimet, duke lejuar largimin e të dënuarve që në një të tretën e dënimit, nga gjysma që aplikohet aktualisht.
Sipas autoriteteve britanike, që nga zgjedhjet e vitit 2024, mbi 58,500 emigrantë të paligjshëm dhe të huaj të dënuar janë deportuar ose larguar nga vendi. Vetëm që nga korriku 2024, janë dëbuar mbi 8,700 persona, një rritje prej 32% krahasuar me periudhën e mëparshme.
Në fuqi është edhe marrëveshja mes Shqipëria dhe Mbretërisë së Bashkuar për transferimin e të burgosurve, sipas së cilës shtetasit shqiptarë të dënuar me mbi katër vite burg mund të rikthehen në vendin e tyre për të vuajtur dënimin.
Autoritetet britanike theksojnë se masat e reja synojnë forcimin e kontrollit ndaj kriminalitetit dhe reduktimin e numrit të të huajve në burgje.
