Detaje të reja janë zbuluar mbi anulimin e tenderit për ndërtimin e portit të ri në Porto Romano, një projekt i konsideruar strategjik për Shqipërinë dhe aleatët e saj.
Sipas gazetares Klodiana Lala, prapaskenat e këtij vendimi tregojnë se anulimi nuk lidhet thjesht me rritjen e kostove të ndërtimit, siç është deklaruar zyrtarisht, por me ndërhyrje dhe zhvillime të tjera më komplekse.
Një rol kyç në këtë histori duket se ka luajtur Dhoma Amerikane e Tregtisë, e cila, vetëm dy ditë para mbylljes së afatit të tenderit, i ka dërguar një email kryeministrit Edi Rama dhe ministrit përkatës, duke kërkuar shtyrjen dhe rishikimin e projektit.
Në emailin e publikuar, kreu i saj Grant Van Cleve sugjeron që projekti të rikonceptohet në përputhje me kërkesat e NATO dhe Korridorit 8, duke propozuar gjithashtu bashkëfinancim nga partnerë ndërkombëtarë si Shtetet e Bashkuara të Amerikës dhe Italia.
Sipas këtij komunikimi, Porto Romano mund të zhvillohet si një port më i madh dhe me standarde të NATO-s, duke përfshirë edhe infrastrukturë “dual-use” (ushtarake dhe civile).
Megjithatë, zhvillimet nuk ndalen këtu. Një javë para mbylljes së garës, hetues të SPAK dhe BKH kanë sekuestruar dokumentacionin e tenderit në Porto Romano, një veprim që ngre dyshime për hetime të mundshme mbi procedurat.
Ndërkohë, vetë kryeministri Rama ka mohuar çdo presion nga ndërkombëtarët, duke folur për “forca të errëta” që sipas tij po përpiqen të pengojnë projektin.
Nga ana tjetër, ish-ministri i Financave Arben Malaj ka ngritur pikëpyetje mbi mënyrën se si është mbyllur tenderi. Ai kërkon sqarim nëse kemi të bëjmë me një anulim nga qeveria apo me tërheqje të operatorit ekonomik.
Sipas Malajt, në rast se kompania është tërhequr nga gara, ajo duhet të penalizohet financiarisht dhe të përfshihet në listën e zezë, për të mbrojtur interesat e buxhetit të shtetit.
E gjithë kjo situatë tregon se projekti i Porto Romanos është përfshirë në një përplasje interesash ekonomike, politike dhe strategjike, ku përfshihen aktorë vendas dhe ndërkombëtarë, duke e kthyer një projekt zhvillimor në një çështje të nxehtë debati publik.
