Një nga viktimat e financierit të ndjerë Jeffrey Epstein ka rrëfyer detaje tronditëse për mënyrën se si ai e trafikonte dhe e dërgonte te njerëz të fuqishëm, duke pretenduar se u abuzua seksualisht edhe në jahtin e biznesmenit Mohamed Al Fayed.
Gruaja, e identifikuar me emrin e ndryshuar “Natalie” për të mbrojtur identitetin e saj, tha se e kishte takuar Epstein kur ishte vetëm 17 vjeç dhe po punonte si modele. Sipas saj, ai e kontrollonte vazhdimisht dhe dinte gjithmonë ku ndodhej.
Ajo rrëfen se në verën e vitit 1997 mori një mesazh nga asistentja e Epstein, e cila i tha se kishte një “mundësi të mirë për karrierën”. Sipas saj, iu kërkua të shkonte në Saint-Tropez për të takuar biznesmenin Mohamed Al Fayed, i cili ndodhej në jahtin e tij.
Natalie tha se ndryshoi menjëherë planet e punës dhe udhëtoi drejt jahtit. Atje, sipas saj, ndodheshin edhe disa persona të tjerë, ndërsa biznesmeni u prezantua si “Mohamed”.
Sipas dëshmisë së saj, gjatë kohës në jaht ai filloi të bënte komente të papërshtatshme me natyrë seksuale dhe më pas e sulmoi seksualisht. Ajo tha se kërkoi të largohej nga jahti, por nuk iu lejua derisa anija u ankorua sërish.
Gruaja deklaron se në atë periudhë ishte mësuar me trajtimin që merrte nga rrjeti i Epstein dhe se shpesh i kërkohej të takonte njerëz të fuqishëm me premtimin se do ta ndihmonin në karrierën e saj si modele.
Dëshmia e saj vjen në një moment kur policia britanike ka intensifikuar hetimet për rrjetin e abuzimeve që dyshohet se ishte ngritur nga Mohamed Al Fayed, i cili ndërroi jetë në vitin 2023.
Sipas raportimeve, më shumë se 400 gra kanë dalë përpara me akuza për përdhunim ose sulme seksuale kundër biznesmenit gjatë viteve.
Policia Metropolitane në Londër po heton gjithashtu lidhjet e mundshme mes rrjetit të Epstein dhe përdorimit të aeroporteve private në Britani për transportimin e grave të reja në vende të ndryshme.
Viktima tha se iu deshën vite për të kuptuar se ajo që kishte përjetuar ishte trafikim dhe shfrytëzim seksual, duke shtuar se beson se ende ka shumë gjëra që nuk janë zbuluar rreth rrjetit të Epstein.
