Një lajm i trishtë ka tronditur komunitetin e Librazhdit. Infermierja 22-vjeçare Klarisa Zharri ka ndërruar jetë në një spital në Itali, pas një beteje të vështirë me një sëmundje të rëndë.
E reja ishte diagnostikuar me një sëmundje autoimune të mëlçisë që kishte çuar në cirrozë të avancuar dhe dështim funksional të organit. Për të shpëtuar jetën e saj nevojitej një transplant i mëlçisë, një ndërhyrje e kushtueshme që kërkonte mbështetje të madhe financiare.
Historia e saj mobilizoi një solidaritet të jashtëzakonshëm. Qytetarë nga Librazhdi, por edhe nga shumë qytete të tjera dhe nga diaspora shqiptare, u bashkuan për të ndihmuar. Brenda pak javësh u mblodhën rreth 100 mijë euro, çka i dha mundësi Klarisës të udhëtonte drejt Italisë për trajtim në një qendër të specializuar për transplantet.
Megjithatë, pavarësisht përpjekjeve të mëdha dhe shpresës që bashkoi një komunitet të tërë, 22-vjeçarja nuk arriti ta fitojë betejën me sëmundjen.
Lajmi për ndarjen e saj nga jeta ka sjellë dhimbje të madhe te familjarët, miqtë dhe te të gjithë ata që kontribuan për ta ndihmuar. Kujtimi i Klarisës dhe solidariteti i treguar për të mbeten një dëshmi e humanizmit dhe mbështetjes që njerëzit mund t’i japin njëri-tjetrit në momentet më të vështira.
