Një tragjedi e rëndë ka tronditur një familje australiane, pasi një vajzë 8-vjeçare humbi jetën në një aksident me motor dëbore në Japoni.
E mitura, Chloe Jeffries nga Queensland, ndodhej me pushime në Luginën Hakuba, në prefekturën Nagano, kur motori i dëborës me të cilin po udhëtonte së bashku me nënën e saj u përmbys.
Sipas raportimeve, aksidenti ndodhi të shtunën paradite, ndërsa mjeti po ngjitej në një kodër përgjatë një shtegu të përcaktuar. Gjatë një manovre kthimi, motori doli nga kursi dhe u përmbys, duke e bllokuar vajzën poshtë tij.
8-vjeçarja u transportua me urgjencë me helikopter drejt spitalit më të afërt, por pavarësisht përpjekjeve të mjekëve për ta shpëtuar, ajo nuk arriti t’u mbijetojë plagëve të marra.
