Një situatë shqetësuese është krijuar në aksin Përrenjas–Librazhd pas zhvendosjes dhe fundosjes së bazamentit të shtyllës së tensionit të lartë 110 kV, nr. 15, që lidh HEC Egnatia me nënstacionin e Librazhd.
Problematika është konstatuar pas lëvizjeve të tokës në zonë, duke ngritur alarmin për sigurinë e linjës së transmetimit të energjisë.
Specialistët e Operatorit të Sistemit të Transmetimit (OST) ndodhen në terren dhe po kryejnë monitorim të vazhdueshëm, ndërsa gjeologë të specializuar po analizojnë stabilitetin e terrenit dhe rrezikun e përkeqësimit të situatës.
Masa emergjente
Sipas burimeve nga terreni, po shqyrtohet një zgjidhje emergjente që përfshin:
- Përforcimin e bazamentit të shtyllës
- Stabilizimin e strukturës metalike me kabuj çeliku
- Masa parandaluese për shmangien e shembjes
Autoritetet theksojnë se linja është aktualisht nën kontroll teknik dhe çdo ndërhyrje do të kryhet me prioritet maksimal për të garantuar furnizimin e qëndrueshëm me energji për zonën.
