Kreu i Partisë Demokratike, Sali Berisha, ka hedhur akuza të forta ndaj drejtuesit të ri të Agjencisë Kombëtare të Shoqërisë së Informacionit (AKSHI), Igli Tafa, duke e cilësuar atë si “vegël të klanit të Surrelit”.
Sipas Berishës, Tafa ka qenë i përfshirë në një tender me vlerë 75 milionë euro, që sipas tij i është dhënë një personi të afërt me familjen e kryeministrit. Ai pretendon se përmes këtij emërimi synohet ruajtja e kontrollit mbi AKSHI-n, një institucion që menaxhon sistemet digjitale shtetërore.
“Në krye të AKSHI vendoset Igli Tafa, autori i tenderit 75 mln euro për baxhanakun e Ramës… Ai është kukull e klanit të Surrelit që do të mbajë me çdo çmim AKSHI-n”, u shpreh Berisha në një deklaratë për mediat, duke shtuar edhe pretendime për pagën e mëparshme të Tafës dhe ndërhyrje nga ana e kryeministrit.
Denoncimi për plagjiaturë
Ndërkohë, studiuesi dhe ish-zv.ministri i Arsimit, Taulant Muka, ka akuzuar publikisht Igli Tafën për plagjiaturë akademike. Sipas Mukës, një artikull shkencor i publikuar nga Tafa në vitin 2011 përmban pjesë të kopjuara nga studime të mëhershme ndërkombëtare.
Muka pretendon se studimi “A Survey of QoS Routing Protocols for Ad Hoc Networks” përmban pasazhe të ngjashme me punime të publikuara në vitet 2008 dhe 2009 nga autorë të huaj. Ai ngre pikëpyetje mbi standardet profesionale në drejtimin e një institucioni që administron të dhënat dhe infrastrukturën digjitale të shtetit.
“Si mund të drejtohet një institucion kaq kritik nga dikush me një precedent të tillë?”, shkruan Muka në reagimin e tij publik.
Konteksti
Igli Tafa u emërua në krye të AKSHI-t pas dorëheqjes së Mirlinda Karçanaj, e cila ndodhet në “arrest shtëpie” me vendim të Gjykatës së Posaçme, nën hetim nga SPAK për akuzën e shkeljes së barazisë në tendera.
SPAK ka lëshuar masa sigurie për disa zyrtarë të institucionit në kuadër të hetimeve për abuzime me tendera.
Deri tani, nuk ka një reagim publik nga Igli Tafa lidhur me akuzat e ngritura nga opozita dhe nga studiuesi Taulant Muka.
