Qarkullimi në aksin Qafë Thore–Theth është ndërprerë plotësisht këtë të diel për shkak të rënies së ortekëve në zonën pranë tuneleve panoramike. Sasia e madhe e borës dhe kushtet e paqëndrueshme atmosferike kanë krijuar rrezik të lartë për lëvizjen e mjeteve.
Sipas autoriteteve vendore, rruga do të qëndrojë e mbyllur për të gjitha automjetet, përfshirë edhe mjetet borëpastruese, deri në një njoftim të dytë. Rreziku për rënie të tjera ortekësh mbetet i lartë, duke e bërë të pamundur ndërhyrjen e menjëhershme për pastrimin e plotë të segmentit.
Prefektura e Qarkut Shkodër u ka bërë thirrje drejtuesve të mjeteve të shmangin këtë aks dhe të respektojnë sinjalistikën rrugore, ndërsa pritet një përmirësim i kushteve atmosferike për të ndërhyrë në sigurinë dhe rihapjen e rrugës.
Thethi, një nga destinacionet më të frekuentuara turistike në veri të vendit, mbetet përkohësisht i izoluar për shkak të kushteve ekstreme të motit.
