Drejtuesi i SPAK, Klodjan Braho, zhvilloi një takim me Presidentin e Eurojust-it, Michael Schmid, në selinë qendrore të këtij institucioni, ku u diskutua forcimi i bashkëpunimit në luftën kundër korrupsionit dhe krimit të organizuar.
Takimi u bë publik nga SPAK dhe Eurojust, ndërsa vjen pak muaj pas vizitës së Schmid në Tiranë gjatë Forumit të 2-të Konsultativ të Kryeprokurorëve të Ballkanit Perëndimor. Në atë aktivitet, ai theksoi rëndësinë e rajonit si partner strategjik për Eurojust dhe shprehu gatishmërinë për të rritur nivelin e koordinimit në hetimet ndërkufitare.
Gjatë vizitës në Shqipëri, Schmid u takua edhe me ambasadorin e BE-së, Silvio Gonzato, duke vlerësuar rolin e SPAK si një faktor kyç në forcimin e sundimit të ligjit dhe rritjen e besimit publik.
Presidenti i Eurojust-it ka shprehur mbështetjen për integrimin evropian të Shqipërisë, duke theksuar se bashkëpunimi gjyqësor është një element thelbësor në rrugën drejt anëtarësimit në Bashkimin Evropian.
