Thithja e avujve nga cigaret elektronike të përdorura nga persona të tjerë mund të përbëjë një rrezik real për shëndetin e mushkërive, paralajmërojnë studiues nga Universiteti i Kalifornisë në Riverside.
Sipas një studimi të fundit, avujt e cigareve elektronike që qëndrojnë pezull në ajër përmbajnë grimca jashtëzakonisht të imëta, të pasura me metale dhe përbërës kimikë aktivë. Këto grimca, edhe kur nuk thithen drejtpërdrejt nga përdoruesi, mund të depërtojnë thellë në sistemin e frymëmarrjes së personave përreth.
Një përzierje e rrezikshme kimikatesh
Në ambiente të mbyllura, avujt e cigareve elektronike reagojnë me ozonin në ajër dhe krijojnë substanca të reja toksike, përfshirë perokside dhe radikale të lira. Këto molekula janë shumë agresive dhe dëmtojnë drejtpërdrejt qelizat e mushkërive.
Gjatë analizave laboratorike, studiuesit gjetën metale si hekuri, alumini dhe zinku, por edhe gjurmë të metaleve të rënda si plumbi dhe arseniku. Grimcat më të vogla rezultuan më të rrezikshmet, pasi përmbanin përqendrime më të larta të substancave toksike.
Rrezik i lartë për mushkëritë
Këto grimca mikroskopike depërtojnë deri në alveola, zona ku oksigjeni kalon në gjak, duke rritur rrezikun e dëmtimeve afatgjata të mushkërive. Personat që vuajnë nga astma apo sëmundje kronike të frymëmarrjes janë veçanërisht të rrezikuar, pasi gjendja e tyre mund të përkeqësohet ndjeshëm.
Studiuesit theksojnë se edhe pse testet janë kryer në kushte laboratorike, rezultatet tregojnë qartë se “avullimi pasiv” nuk është i padëmshëm dhe nuk duhet nënvlerësuar.
