Paralajmërimet e kryeministrit Edi Rama për ndryshime ligjore që do të kufizonin mundësinë e pezullimit nga detyra të ministrave po shkaktojnë shqetësim të fortë te shoqëria civile dhe opozita. Sipas tyre, këto lëvizje rrezikojnë seriozisht luftën kundër korrupsionit dhe procesin e integrimit europian të Shqipërisë.
Reagimet vijnë pas vendimit të Gjykatës Kushtetuese që la në fuqi pezullimin nga detyra të zv/kryeministres Belinda Balluku, duke rrëzuar pretendimin e kryeministrit se masa cenonte kompetencat e tij kushtetuese. Rama e cilësoi pezullimin si paralizim të funksioneve shtetërore dhe paralajmëroi nisma ligjore për ta ndaluar një praktikë të tillë në të ardhmen.
Opozita e konsideron këtë qëndrim si presion të hapur ndaj drejtësisë. Sipas saj, bashkërendimi i qeverisë dhe Kuvendit kundër vendimeve të gjykatave përbën shkelje të parimit të ndarjes së pushteteve dhe minon pavarësinë e institucioneve të drejtësisë.
Edhe organizatat e shoqërisë civile paralajmërojnë se këto iniciativa krijojnë një imunitet të ri politik për zyrtarët e lartë dhe bien ndesh me standardet demokratike europiane. Sipas tyre, nisma të tilla do të pengonin hetimet e institucioneve të posaçme dhe do të dobësonin besimin publik te drejtësia.
Ekspertët theksojnë se në vendet e Bashkimit Europian zyrtarët e lartë nën hetim nuk mbrohen me ligje speciale, por përballen me drejtësinë ose japin dorëheqjen. Nëse Shqipëria ndjek drejtimin e kundërt, paralajmërohet se vendi rrezikon të devijojë nga parimet e shtetit të së drejtës dhe të përballet me pasoja serioze në rrugën drejt integrimit europian.
