Ende nuk është një legjendë. Dhe rruga për të arritur nivelin e emrave si Pelé, Diego Armando Maradona apo Lionel Messi është e gjatë dhe e vështirë. Por një gjë është e qartë: Lamine Yamal po vendos standarde që po entuziazmojnë tifozët e Barcelonës.
Talenti që sapo ka mbushur 18 vjeç ka shënuar një rritje të jashtëzakonshme në cilësinë e paraqitjeve të tij, duke u kthyer në një lojtar kyç për katalanasit këtë sezon. Jo vetëm për statistikat, por për ndikimin e drejtpërdrejtë në lojë.
Sipas prestigjiozes spanjolle “El Mundo Deportivo”, Yamal ka tejkaluar pritshmëritë si në gola ashtu edhe në asistime, një tregues i qartë i hopit cilësor që ka bërë. Gazeta e cilëson atë si “lokomotivën” e ekipit, futbollistin që tërheq pas vetes gjithë skuadrën.
Deri në këtë fazë të sezonit, Lamine Yamal ka regjistruar 14 gola dhe 13 asistë në të gjitha kompeticionet – La Liga, Champions League dhe kupat – duke luajtur 29 ndeshje. Kjo do të thotë një kontribut pothuajse një gol për ndeshje, shifër mbresëlënëse për një futbollist adoleshent.
Por ndikimi i tij shkon përtej statistikave. Yamal është kthyer në pikë referimi në lojën sulmuese të Barcelonës, duke krijuar hapësira, ritëm dhe ide, edhe në ndeshjet ku nuk shënon apo asiston.
Në moshën 18-vjeçare, ai ka shënuar 39 gola me fanellën “blaugrana” që nga debutimi me ekipin e parë, një shifër që Lionel Messi nuk e arriti në të njëjtën moshë. Po ashtu, ai ka kaluar numrin e golave të Diego Armando Maradonës me Barcelonën, i cili u ndal në 38.
Megjithatë, krahasimi kërkon kontekst. Maradona i shënoi 38 golat në vetëm 58 ndeshje, ndërsa Yamalit i janë dashur 135 paraqitje. Nga ana tjetër, Messi arriti në 38 gola pas 98 ndeshjesh. Shifrat ndryshojnë, por potenciali mbetet i jashtëzakonshëm.
Në aspektin e trofeve, Lamine Yamal ka një palmares mbresëlënës për moshën e tij: Kampion Europe me Spanjën, dy tituj kampion në La Liga me Barcelonën, Kupa e Mbretit dhe dy Superkupa të Spanjës, të gjitha me fanellën katalanase.
Nuk është ende legjendë. Por gjithnjë e më shumë, Lamine Yamal po shndërrohet në liderin e ri të Barcelonës – një futbollist që nuk premton vetëm të ardhmen, por po dominon të tashmen.
