Një zjarr është regjistruar në orët e para të mëngjesit të së martës në burgun Kassavetia në Greqi, duke shkaktuar panik dhe ndërhyrje të menjëhershme të shërbimeve të emergjencës.
Zjarri ka shpërthyer pak kohë pasi në këtë institucion u raportuan raste të të burgosurve të mitur të diagnostikuar me tuberkuloz, konkretisht në një repart të posaçëm për të mitur. Ende nuk dihet nëse këto zhvillime kanë lidhje direkte me incidentin.
Forcat zjarrfikëse mbërritën shpejt në vendngjarje dhe arritën ta vënë flakën nën kontroll brenda një kohe të shkurtër. Megjithatë, tymi i dendur që u përhap në qeli shkaktoi probleme shëndetësore për disa prej të miturve të burgosur.
Si pasojë, 11 të burgosur të mitur u transportuan në spital për shkak të asfiksisë nga tymi. Ata morën ndihmën e parë mjekësore dhe, sipas autoriteteve, ndodhen jashtë rrezikut për jetën.
Incidenti vjen në një klimë tensioni brenda burgut, pas njoftimit se dy të burgosur ishin diagnostikuar me tuberkuloz ditën e shtunë. Autoritetet greke kanë nisur hetimet për të zbardhur shkaqet e zjarrit dhe për të verifikuar nëse ekziston ndonjë lidhje mes ngjarjes dhe situatës shëndetësore në institucion.
