Një debat i ashpër ka shpërthyer mes Kryeministrit Edi Rama dhe rrjetit ndërkombëtar Safe Journalists, pas një deklarate kritike të kësaj organizate për qëndrimet e kreut të qeverisë ndaj Radio Televizionit Shqiptar.
Safe Journalists shprehu shqetësim se deklaratat publike të Kryeministrit lidhur me rolin, financimin dhe të ardhmen e RTSH-së mund të interpretohen si presion politik mbi transmetuesin publik. Sipas rrjetit, çdo lidhje mes financimit apo ekzistencës së RTSH-së dhe miratimit politik minon pavarësinë editoriale dhe përbën rrezik serioz për lirinë e medias, veçanërisht në kontekstin e procesit të integrimit europian të Shqipërisë.
Reagimi i Kryeministrit ishte i menjëhershëm dhe i fortë. Rama e cilësoi deklaratën e Safe Journalists si një “keqkuptim thellësisht të shtrembëruar” të fjalës së tij dhe si shembull të asaj që ai e quan “përtaci për të dëgjuar realisht çfarë thuhet”.
Sipas tij, vërejtjet e bëra për RTSH-në nuk kanë asnjë lidhje me kushtëzimin politik të financimit apo ekzistencës së transmetuesit publik. Çdo interpretim i tillë, thekson Rama, është “i pasaktë dhe keqorientues”, ndërsa i fton autorët e deklaratës që të rilexojnë ose ridëgjojnë me kujdes fjalimin e tij dhe të përpiqen të kuptojnë thelbin e mesazhit.
Në reagimin e tij, Kryeministri nënvizon se mbrojtja e informacionit dhe e lirisë së medias nis pikërisht nga mos përhapja e dezinformimit, duke lënë të kuptohet se kritika e Safe Journalists, sipas tij, ka kaluar kufirin e një shqetësimi legjitim.
Përplasja e fundit e rikthen RTSH-në dhe pavarësinë e medias publike në qendër të debatit politik, në një moment delikat për vendin, ku standardet e lirisë së medias mbeten një nga kushtet kyçe në rrugën drejt Bashkimit Europian.
