Një vajzë 13-vjeçare humbi jetën tragjikisht pasi shtrati i saj marinari u përfshi nga flakët, ndërsa dyshohet se shkaku i zjarrit ishte përdorimi i një çakmaku.
Ngjarja ndodhi në një banesë në Kingsway, Prescot, ku shërbimet zjarrfikëse ndërhynë pas njoftimit për zjarr. Brenda shtëpisë, zjarrfikësit gjetën të pajetë Layla Allen, e cila ishte shtrirë në shtratin e sipërm të krevatit të saj dhe u shpall e vdekur në vendngjarje.
Sipas hetimeve, pjesa tjetër e familjes kishte arritur të dilte nga banesa, ndërsa vajza mbeti e bllokuar në dhomën e saj. Prindërit dhe pesë fëmijët e tjerë shpëtuan pa lëndime.
Mjekja ligjore bëri me dije se policia nuk ka mundur të marrë dëshmi nga fëmijët e tjerë që ndodheshin në shtëpi në momentin e zjarrit, për shkak të gjendjes së rënduar emocionale, çka ka kufizuar mbledhjen e provave të plota.
Nga verifikimet rezulton se janë përjashtuar të gjitha burimet e tjera të mundshme të zjarrit, përveç një flake të hapur. Brenda banesës u gjetën dy çakmakë njëpërdorimësh, për të cilët prindërit deklaruan se nuk ishin të tyre.
Hetuesit vlerësojnë se vajza ka qenë duke fjetur në momentin kur zjarri ka nisur. Ekzaminimi pas vdekjes tregoi se shkaku i humbjes së jetës ishte thithja e monoksidit të karbonit dhe efektet e zjarrit.
Hetimi nuk arriti të përcaktojë me siguri se si nisi zjarri. Për këtë arsye, mjekja ligjore dha një përfundim të hapur, duke theksuar se mbeten ende shumë pikëpyetje pa përgjigje.
U theksua gjithashtu se ky ishte zjarri i dytë në këtë banesë brenda një viti, në rrethana të ngjashme, ndërsa kësaj here pasojat ishin fatale.
