Një deklaratë e zëdhënëses së Shtëpisë së Bardhë, Karoline Leavitt, është bërë virale në rrjetet sociale pas incidentit me armë gjatë Darkës së Korrespondentëve në Washington, D.C..
Në një intervistë të dhënë përpara eventit, Leavitt, duke iu referuar fjalimit të presidentit Donald Trump, ishte shprehur se “do të ketë disa të shtëna në sallë”. Deklarata, në kontekstin fillestar, kishte kuptim figurativ dhe lidhej me stilin e drejtpërdrejtë dhe provokues të fjalimeve të Trump.
Ajo kishte theksuar se presidenti ishte i përgatitur për një fjalim “tipik”, të gjallë dhe argëtues, duke shtuar se pjesa më e madhe e tij ishte shkruar nga vetë Trump.
Megjithatë, pas incidentit real me të shtëna që ndodhi më vonë gjatë eventit, kjo deklaratë ka marrë një vëmendje të madhe online për shkak të përputhjes së papritur në kohë, duke u shpërndarë gjerësisht në platforma sociale.
Autoritetet amerikane kanë sqaruar se sulmi ishte një akt i izoluar dhe nuk ka lidhje me deklaratën në fjalë, ndërsa hetimet për zbardhjen e plotë të ngjarjes vijojnë.
