Kryetari i Partisë Demokratike, Sali Berisha, ka ironizuar ashpër heshtjen e kryeministrit Edi Rama lidhur me operacionin e Shteteve të Bashkuara për kapjen e presidentit të Venezuelës, Nicolas Maduro, një zhvillim që ka tronditur politikën ndërkombëtare.
Në një postim të shkurtër por therës në rrjetet sociale, Berisha ka vënë në shënjestër podcastin e Ramës “Flasim”, duke deklaruar se pas kësaj ngjarjeje ai duhet të ndryshojë emër dhe të quhet “Heshtim”.
Sipas Berishës, ndërsa bota politike ka reaguar ndaj arrestimit të Maduros dhe mesazhit të fortë amerikan kundër regjimeve autoritare dhe narkoshteteve, kryeministri shqiptar ka zgjedhur të fshihet pas heshtjes, duke shmangur çdo reagim personal.
Edhe pse Ministrja e Jashtme, Elisa Spiropali, doli me një deklaratë mbështetëse për SHBA-të, Rama vetë nuk ka thënë asnjë fjalë, një qëndrim që Berisha e interpreton si frikë politike dhe personale.
Ish-kryeministri sugjeron se kjo heshtje nuk është rastësore, por lidhet me paralelen që po bëhet gjithnjë e më shpesh mes regjimit të Maduros dhe qeverisjes së Ramës, të cilën opozita e cilëson si të kapur nga krimi, korrupsioni dhe pandëshkueshmëria.
Ironia e Berishës kulmon me përdorimin e termit “Ramaduro”, një lojë fjalësh që synon ta vendosë kryeministrin shqiptar në të njëjtën linjë politike dhe morale me liderin venezuelian të arrestuar.
“Ramaduro versus Maduro” – shkruan Berisha, duke shtuar se nga sot podcasti i Edi Ramës “Flasim” pagëzohet me emrin e ri “Heshtim”. “Gëzuar emrin!”, përfundon ai me sarkazëm.
Heshtja e Ramës, në një moment kur aleatët ndërkombëtarë të Shqipërisë po rreshtohen hapur dhe kur zhvillimet globale po dërgojnë sinjale të forta kundër regjimeve autoritare, po shihet nga opozita si shenjë dobësie dhe pasigurie.
Ndërsa të tjerë flasin, reagojnë dhe pozicionohen, kryeministri shqiptar zgjedh të heshtë. Dhe sipas Berishës, kjo heshtje flet më shumë se çdo podcast.
