Japonia, Koreja e Jugut, Koreja e Veriut dhe Kina janë mes vendeve të para që kanë mirëpritur Vitin e Ri 2026, mes festimeve, por edhe masave të shtuara të sigurisë.
Në Tokio, qytetarët kanë ndjekur festimet live në zona të ndryshme të qytetit, megjithatë eventi tradicional i numërimit mbrapsht në stacionin kryesor hekurudhor të Shibuya-s është anuluar për të gjashtin vit radhazi, për arsye sigurie dhe menaxhimi të turmave.
Ndërkohë, në Seul dhe në pjesën tjetër të Azisë Lindore dhe Juglindore, festimet e Vitit të Ri kalendarik po ndërthuren me përgatitjet për Vitin e Ri Hënor, i cili do të festohet në shkurt 2026 dhe mbetet festa më e rëndësishme për miliona njerëz në rajon.
Edhe Kina ka hyrë në vitin e ri, së bashku me Filipinet, Malajzinë dhe disa pjesë të Indonezisë. Festime janë zhvilluar gjithashtu në Mongoli, Tajvan, Brunei, Hong Kong, Singapor, Makao, Irkutski në Rusi, Perth në Australinë Perëndimore, si edhe në disa zona të Antarktidës.
Autoritetet në disa vende kanë vendosur kufizime dhe anulime eventesh masive për të garantuar sigurinë e qytetarëve, ndërsa festimet po zhvillohen kryesisht në mënyrë të kontrolluar dhe të shpërndarë në hapësira të ndryshme publike.
Për shumë qytetarë në Kinë dhe Azinë Lindore, Viti i Ri Hënor vazhdon të mbetet momenti kulmor i festimeve vjetore, duke lënë Vitin e Ri kalendarik më tepër si një simbol të ndërrimit të viteve.
