Presidenti rus Vladimir Putin ka përcjellë mesazhin e tij për Vitin e Ri 2026, duke iu referuar në mënyrë të tërthortë luftës në Ukrainë dhe duke theksuar besimin e palëkundur të Rusisë në fitoren përfundimtare.
Në fjalën e tij, Putin u shpreh se edhe pse çdo qytetar përjeton histori personale dhe sfida të ndryshme, ato janë të pandara nga rruga që ndjek vendi. Sipas tij, puna dhe kontributi i secilit rus ndërtojnë kapitujt e rinj të historisë së gjatë të shtetit rus, ndërsa uniteti kombëtar mbetet themeli i sovranitetit, sigurisë dhe zhvillimit.
Ai e përshkroi Vitin e Ri si një moment shprese dhe besimi te e mira, ku marrin rëndësi vlera si dashuria, miqësia, solidariteti dhe dhembshuria. Putin theksoi nevojën për kujdes ndaj njerëzve në vështirësi dhe shprehu mbështetje të veçantë për ushtarët rusë të angazhuar në konflikt.
Duke iu drejtuar drejtpërdrejt forcave të armatosura, presidenti rus deklaroi se ata kanë marrë mbi vete përgjegjësinë për të mbrojtur atdheun, drejtësinë dhe të vërtetën. Ai nënvizoi se miliona qytetarë rusë qëndrojnë në krah të tyre dhe shprehu bindjen se fitorja do të arrihet. “Ne besojmë tek ju dhe në fitoren tonë”, u shpreh Putin.
Në përmbyllje, ai foli për domethënien simbolike të ndërrimit të viteve, një moment që tradicionalisht festohet pranë familjarëve dhe njerëzve të dashur, edhe kur ata ndodhen larg. Putin u uroi qytetarëve shëndet, lumturi, begati dhe mirëkuptim, duke theksuar se dashuria dhe traditat janë burim force dhe frymëzimi për të ardhmen.
