Gjykata Kushtetuese është vënë në qendër të kritikave të forta politike, pasi akuzohet se po vepron si një detashment politik në shërbim të kryeministrit Edi Rama dhe zëvendëskryeministres Belinda Balluku, duke u përfshirë në mënyrë të paprecedentë në një çështje penale ende në shqyrtim.
Përmes një deklarate publike, Gjykata Kushtetuese reagoi ndaj pretendimeve që kanë qarkulluar së fundmi për një vendimmarrje të supozuar mbi pezullimin e masës “pezullim nga detyra” ndaj Belinda Ballukut. Sipas Gjykatës, nuk ka pasur asnjë votim apo vendim për pezullimin e vendimeve të Gjykatës së Posaçme dhe çdo interpretim i tillë është i pavërtetë, pasi çështja ndodhet ende në proces shqyrtimi.
Gjykata bëri të ditur se më 22 janar 2026 do të zhvillohet një seancë plenare publike, ku do të shqyrtohet kërkesa e paraqitur nga Kryeministri. Në këtë seancë do të marrin pjesë si palë të interesuara Presidenti i Republikës, Kuvendi, SPAK dhe GJKKO. Në deklaratë, Gjykata u bëri thirrje aktorëve politikë dhe publikë të shmangin deklaratat e nxituara dhe përgojimin e gjyqtarëve, duke theksuar se këto veprime cenojnë procesin e rregullt kushtetues dhe krijojnë perceptim paragjykues.
Megjithatë, reagimi i Gjykatës Kushtetuese nuk ka shuar kritikat nga opozita. Kreu i Grupit Parlamentar të Partisë Demokratike, Gazment Bardhi, ka ngritur pikëpyetje serioze mbi mënyrën se si është trajtuar kjo çështje. Sipas tij, Gjykata duhet të sqarojë pse pranoi kërkesën e Kryeministrit për pezullimin e një vendimi penal, ndërkohë që në raste të ngjashme ka refuzuar kërkesa të paraqitura nga një e pesta e deputetëve.
Bardhi e cilëson këtë si një shembull të qartë të zbatimit të dy standardeve dhe thekson se përmes presionit ndaj Gjykatës Kushtetuese, kryeministri po përpiqet të pengojë drejtësinë dhe të mbrojë korrupsionin qeveritar. Ai kërkon transparencë të plotë mbi arsyet kushtetuese që kanë çuar në pranimin e kërkesës së Kryeministrit, si dhe shpjegime të qarta për legjitimimin e kësaj kërkese, në kontrast me refuzimin e të drejtës së deputetëve për raste të ngjashme.
Sipas opozitës, mungesa e këtyre sqarimeve rrezikon të thellojë më tej mosbesimin e publikut ndaj Gjykatës Kushtetuese dhe të forcojë bindjen se institucioni është vënë nën ndikim politik, në një moment kritik për luftën kundër korrupsionit dhe funksionimin e shtetit të së drejtës.
