Një tjetër incident shqetësues me përfshirjen e nxënësve është regjistruar në Shkodër, ku dhjetëra adoleshentë janë përfshirë në një sherr të dhunshëm fizik.
Ngjarja ka ndodhur të premten, kur disa nxënës nga zona e Vau Dejës, pas përfundimit të mësimit, kishin lënë takim për t’u “sqaruar” lidhur me konfliktet mes tyre. Ata u mblodhën pranë vendqëndrimit të furgonëve, me të cilët udhëtojnë çdo ditë drejt shkollës dhe në kthim, ku situata degradoi shpejt.
Fillimisht, dy grupe adoleshentësh u përplasën me grushte dhe shqelma, duke rrëzuar disa prej tyre në tokë. Por konflikti u përshkallëzua edhe më tej, kur njëri nga të rinjtë nxori një thikë, vendosi kapuçin e xhaketës në kokë dhe tentoi të sulmonte grupin rival.
Fatmirësisht, nga përplasja nuk raportohet për persona të plagosur apo të lënduar nga arma e ftohtë. Ndërhyrja e një zonje, e cila u fut mes adoleshentëve, bëri që sherri të ndalej, duke shmangur pasoja më të rënda.
Pamjet e ngjarjes kanë shkaktuar shqetësim të madh, ndërsa rasti ngre edhe një herë alarmin për dhunën mes të rinjve dhe nevojën për masa parandaluese nga familjet dhe institucionet arsimore.
