Ish-deputeti i PD-së, Lefter Maliqi, ka publikuar një dokument zyrtar të SPAK, ku konfirmohet se kryebashkiaku i Kuçovës, Kreshnik Hajdari, është marrë nën hetim për katër kallëzime penale.
Dokumenti i ardhur nga SPAK, të cilin Maliqi e ka bërë publik në Facebook, tregon se kreu i Bashkisë Kuçovë po hetohet për deklarim të rremë, shkelje të ligjit të dekriminalizimit dhe çështje të tjera që lidhen me ushtrimin e funksionit publik.
Maliqi: Hajdari duhej shkarkuar me kohë – kush e mbron?
Krahas dokumentit, Maliqi akuzon se Hajdari është mbajtur në detyrë në mënyrë të paligjshme:
“Gjykata Administrative rrëzoi ankimin e Hajdarit për shkarkimin. Ai është i dënuar më parë dhe nuk e apeloi vendimin. Duhej të ishte shkarkuar nga KQZ dhe Kryeministri. Kush po e mbron ende? Oligarkë? Ministrat? Pse po e keqpërdorin?”
Sipas tij, Hajdari është subjekt i disa çështjeve në hetim, përfshirë tendera të dyshimtë dhe kallëzime të shumta nga aktorë të ndryshëm politikë e juridikë.
SPAK: Hajdari ka dhënë deklarim të rremë në formularin e dekriminalizimit
Në dokumentin që SPAK i ka dërguar zyrtarisht Maliqit, theksohet se nga verifikimet ka rezultuar se:
- Gjatë zgjedhjeve të vitit 2019, Hajdari ka deklaruar se nuk ka qenë i hetuar apo i dënuar ndonjëherë.
- Por hetimet e SPAK zbuluan se ai është i dënuar me vendim të formës së prerë në vitin 1999 nga Gjykata e Janinës në Greqi, për veprën penale “Hyrje të paligjshme në territor”, me masën “qortim” si masë riedukuese.
- Edhe gjatë kandidimit në zgjedhjet e vitit 2023, Hajdari kishte detyrim të ri-përditësonte dhe deklaronte vendimin penal, gjë që nuk e ka bërë.
Sipas SPAK, mosdeklarimi përbën shkelje të ligjit të dekriminalizimit dhe është një nga bazat e hetimit penal.
Maliqi përmend tendera të dyshimtë dhe akuza të tjera
Maliqi pretendon se ndaj Hajdarit janë hapur hetime edhe për:
- Tenderin 1 milion euro në zonën e Havaleas, për të cilin ai ka depozituar kallëzim.
- Dy kallëzime të avokatit Arben Llangozi, sipas tij.
- Një kallëzim të deputetes Albana Vokshi.
- Një hetim tjetër nga Prokuroria e Beratit për 4 milionë euro në projektin e Sinjës.
Ai akuzon se kreu i bashkisë po përdoret nga interesa të caktuara ekonomike e politike:
“Kush po e mbron? Pse po i jepen tendera me porosi? A do t’i marrë Hajdari me vete në hetime të gjithë këta?”
Maliqi: Largimi i Hajdarit është çështje kohe
Në përfundim të reagimit, Maliqi shprehet se:
- Opozita do të ngrihet kundër “pazareve të pista”
- Procesi i hetimit do të çojë para drejtësisë jo vetëm Hajdarin, por edhe ata që “e kanë mbrojtur”
- Ai vetë beson se opozita do të rikthejë Bashkitë Berat dhe Kuçovë.
