Federica Mogherini, ish-përfaqësuesja e lartë e Bashkimit Evropian për Politikën e Jashtme dhe rektore e Kolegjit të Evropës që prej vitit 2020, ka njoftuar dorëheqjen nga posti i saj pas hapjes së një hetimi zyrtar për mashtrim dhe korrupsion të mundshëm në lidhje me një tender të financuar nga BE-ja.
Vendimi u komunikua të enjten, pas mbledhjes së Komitetit Ekzekutiv të Kolegjit. “Sot kam vendosur të jap dorëheqjen si rektore,” deklaroi Mogherini, duke shtuar se ka “besim të plotë në drejtësinë” dhe se është e bindur që korrektësia e veprimeve të institucionit do të vërtetohet. Ajo theksoi gjithashtu se do të bashkëpunojë plotësisht me autoritetet hetuese.
Hetimi, i udhëhequr nga Prokurori Publik Evropian (EPPO), përqendrohet në një kontratë njëvjeçare të vitit 2021–2022, e lidhur me krijimin e një akademie trajnimi për diplomatët e rinj të BE-së dhe administratën publike kombëtare. Prokurorët dyshojnë se Kolegji i Evropës mund të ketë përfituar informacion paraprak për tenderin, duke krijuar avantazh të padrejtë, si dhe mund të ketë patur devijime të mundshme në përdorimin e fondeve të BE-së.
Dorëheqja e Mogherinit vjen vetëm një ditë pasi një tjetër zyrtar i lartë i BE-së, Stefano Sannino, njoftoi largimin nga detyra në fund të dhjetorit, pasi edhe ai u përfshi në të njëjtin hetim. Sannino drejton Drejtorinë e Përgjithshme të Komisionit Evropian për Lindjen e Mesme, Afrikën e Veriut dhe Gjirin.
Mogherini ka mbikëqyrur gjatë mandatit të saj tre kampuset e Kolegjit të Evropës — në Bruges, Varshavë dhe Tiranë — si dhe ka udhëhequr Akademinë Diplomatike të BE-së që prej vitit 2022, pozicion i cili u bë i përhershëm në vitin 2024 dhe financohet me 1.7 milionë euro në vit.
Hetimet pritet të zgjasin në muajt e ardhshëm, ndërsa institucionet evropiane fokusohen në sqarimin e procedurave të tenderimit dhe administrimit të fondeve publike.
