31-vjeçari Juxhin Koka është ekstraduar nga Spanja drejt vendit tonë. I riu ishte shpallur në kërkim ndërkombëtar nga SPAK dhe GJKKO i kishte caktuar masën e sigurisë “arrest me burg”, për trafikimin e 200 mijë litrave naftë nga një anije në Durrës
Juxhin Koka akuzohet për veprat penale, “Korrupsion aktiv i personave qe ushtrojnë funksione publike”, “Vjedhje” dhe “Kondrabanda me mallrat qe paguhet akcize” kryer ne bashkëpunim”.
SPAK njoftoi më 13 tetor përfundimin e hetimeve dhe dërgimin për gjykim të çështjes penale në ngarkim të 11 të pandehurve për kontrabandaim të 200 mijë litrave naftë përmes një anije tuniziane në muajin janar.
Sipas SPAK, i pandehuri Juxhin Koka akuzohet se në bashkëpunim me kapitentin e anijes me flamur tunizian, oficerin e parë të anijes si dhe katër marinarët kanë planifikuar dhe realizuar kontrabandimin e 200 mijë litrave naftë që gjendej në anijen e ankoruar në Porto Romano të Durrësit, më datë 7 janar të këtij viti.
Anija dhe nafta e kontrabanduar janë sekuestruar nga policia e Durrësit me 12 janar. Nga hetimet ka rezultuar se të pandehurit Juxhin Koka dhe Drilon Malluta, i kanë ofruar shumën 10 mijë euro punonjësit të policisë Armand Marvataj, i cili ishte në shërbim për ruajtjen e anijes së sekuestruar, me qëllim që të lejonte nxjerrjen e sasisë së naftës.
Vjedhja e naftës është realizuar mbrëmjen e 27 janarit, në bashkëpunim me ekuipazhin e anijes, inxhinierin dhe përgjegjësin teknik dhe marinarët.
Njoftimi:
Akuzohet nga SPAK, se në muajin shkurt, 2025, korruptoi punonjësit e Policisë dhe vodhi, në bashkëpunim me shtetas të tjerë, 200 000 litra naftë nga një anije e ankoruar në portin e Durrësit, ekstradohet nga Spanja, 31-vjeçari.
Si rezultat i koordinimit të veprimeve operacionale, ndërmjet specialistëve të Interpol Tiranës dhe homologëve të Interpol Madridit, u finalizua në kuadër të operacionit “The Wanted”, procedura për ekstradimin nga Spanja, në Shqipëri, të shtetasit shqiptar, të shpallur në kërkim ndërkombëtar, J. K., 31 vjeç.
