Deputeti i zgjedhur i PD-së, Klevis Balliu ka denoncuar kryebashkiakun e Tropojës, duke hedhur akuza se është përfshirë në skandal vetëm 1 javë pas daljes nga arresti shtëpiak. Në një deklaratë për mediat, Balliu shprehet se Rexhë Byberaj ka shpërdoruar sërish detyrën për të favorizuar familjarët e tij në një procedurë tenderimi.
Ai deklaroi se, më datë 15 korrik 2025, Bashkia Tropojë ka zhvilluar tenderin me objekt “Ndërtim Rruga Auto Kika – Gjarpri i Dragobisë – Qafë Paje”, me vlerë 82.911.061 lekë pa TVSH. Balliu shprehet se në këtë garë morën pjesë 11 kompani, prej të cilave 10 u skualifikuan, ndërsa fituese u shpall bashkimi i operatorëve ekonomikë BOE GRIALD & INA & VLLAZNIMI me ofertë 63.823.998 lekë pa TVSH.
Sipas tij, “gjysma e këtij bashkimi operatorësh, kompania Vllaznimi shpk, drejtohet nga Bashkim Byberi – djali i xhaxhait të Rexhe Byberajt – duke krijuar një konflikt interesi të hapur dhe të rëndë”.
