Presidenti Donald Trump ka hequr të drejtën për akses në informacionet e klasifikuara për dy figura të rëndësishme të administratës së Joe Biden: Antony Blinken, ish-Sekretar i Shtetit dhe Jake Sullivan, ish-Këshilltar i Sigurisë Kombëtare. Ky veprim është bërë publike nga zyrtarët e Shtëpisë së Bardhë të shtunën.
Trump, duke komentuar për Blinken, e quajti atë “djalë i keq” dhe e urdhëroi heqjen e lejes për akses në informacionet e klasifikuara. Ky veprim ndodhi një ditë pas qëndrimit të ngjashëm për Joe Biden, ku Trump tha se i kishte hequr autorizimin për të pasur akses në informacionet e inteligjencës.
Përveç Blinken dhe Sullivan, Trump ka hequr gjithashtu autorizimin e sigurisë për Lisa Monaco, Zëvendës Prokuroren e Përgjithshme të Biden, si dhe për Letitia James, Prokuroren e Përgjithshme të Nju Jorkut, dhe Alvin Bragg, Prokurorin e Qarkut të Manhatanit, të cilët janë të përfshirë në çështje ligjore kundër Trump.
