Kreu i Partisë Demokratike, Sali Berisha, ka hedhur akuza të forta ndaj qeverisë, duke pretenduar se në Shqipëri po ndodh kontrabandë e organizuar e naftës në nivele të larta.
Në një deklaratë publike, Berisha tha se rreth 350 mijë ton naftë “zhduken”, duke e lidhur këtë fenomen me atë që ai e cilësoi si kontrabandë të drejtuar nga qeveria.
Sipas tij, nafta që vjen me anije nga Libia kontrollohet nga struktura shtetërore dhe përdoret për përfitime të paligjshme, ndërsa qytetarët përballen me çmime të larta.
Berisha theksoi se një nga arsyet kryesore të çmimit të lartë të karburanteve është ngarkesa fiskale, që sipas tij arrin deri në 60% të çmimit për litër.
Ai shtoi se kjo situatë përbën një “plaçkitje masive” për qytetarët, duke krahasuar Shqipërinë me vendet e rajonit, ku sipas tij çmimet janë dukshëm më të ulëta.
Në përfundim, Berisha deklaroi se dy faktorët kryesorë që ndikojnë në çmimin e lartë të naftës janë taksat e larta dhe kontrabanda, për të cilën ai fajësoi drejtpërdrejt qeverinë.
