Situata në degën e Partisë Demokratike në Elbasan është tensionuar ndjeshëm në ditën kur po zhvillohet procesi për zgjedhjen e drejtuesit të ri lokal.
Në garë për drejtimin e degës janë pesë kandidatë: Lumturi Hasa, Durim Çekrezi, Elior Vila, Sokol Shkëlzeni dhe Alis Narazani. Ky proces konsiderohet i rëndësishëm për organizimin dhe të ardhmen e PD-së në këtë qytet.
Megjithatë, procesi është shoqëruar me polemika, pasi disa anëtarë pretendojnë se janë përjashtuar nga listat e anëtarësisë pa asnjë njoftim paraprak.
E para që reagoi ishte Doris Madhi, e cila denoncoi publikisht se emri i saj ishte hequr nga lista. Sipas burimeve, nga listat janë hequr edhe Rudina Alla, kryetare e Forumit të Gruas, Zheni Gjergji dhe Alesia Balliu.
Këto zhvillime kanë ngritur dyshime për ndërhyrje në procesin e brendshëm dhe kanë shtuar tensionet mes anëtarëve të partisë në Elbasan.
Ngjarja vjen vetëm pak ditë pas përjashtimeve të tjera në radhët e Partisë Demokratike në Durrës, çka tregon për një klimë të tensionuar brenda opozitës.
Deri tani nuk ka një reagim zyrtar nga drejtuesit qendrorë të partisë për këto pretendime, ndërsa mbetet për t’u parë se si do të ndikojnë këto zhvillime në rezultatin e zgjedhjeve dhe në situatën e brendshme të PD-së.
