Pas aksidentit tragjik në Durrës, ku humbën jetën dy fëmijë dhe një tjetër mbeti i plagosur, Policia e Shtetit ka marrë masa të menjëhershme administrative ndaj drejtuesve vendorë.
Drejtori i Përgjithshëm i Policisë së Shtetit, Skënder Hita, ka urdhëruar pezullimin nga detyra të disa drejtuesve kryesorë të policisë në Durrës, për shkak të performancës së dobët në përmbushjen e detyrave.
Të pezulluar janë:
- Drejtori i Drejtorisë Vendore të Policisë Durrës, Afrim Tafa
- Zëvendësdrejtori për Rendin dhe Sigurinë Publike, Zija Sulaj
- Shefi i Policisë Rrugore, Kreshnik Skëndo
Menjëherë pas ngjarjes, është ngritur një grup ekspertësh nga Policia Rrugore, i cili ka shkuar në vendin e aksidentit për të analizuar shkaqet dhe rrethanat që çuan në këtë tragjedi.
Ndërkohë, Drejtoria e Standardeve Profesionale ka nisur një hetim disiplinor për të verifikuar nëse ka përgjegjësi konkrete nga efektivët e policisë në lidhje me ngjarjen.
Ky vendim vjen në një moment kur opinioni publik kërkon përgjegjësi institucionale dhe masa më të forta për garantimin e sigurisë rrugore, pas një prej ngjarjeve më të rënda që ka tronditur vendin ditët e fundit.
