Një tragjedi e rëndë është shënuar në brigjet e Turqi, ku një varkë me emigrantë është fundosur pranë zonës së Bodrum.
Sipas mediave turke, të paktën 19 persona kanë humbur jetën, ndërsa 20 të tjerë janë shpëtuar nga ekipet e kërkim-shpëtimit.
Guvernatori i Muglas, Idris Akbıyık, bëri të ditur se të gjithë emigrantët në bord ishin shtetas afganë. Ai theksoi se shkak i aksidentit dyshohet të ketë qenë moti i keq dhe kushtet e vështira në det.
“Për shkak të kushteve të këqija të detit dhe motit, varka u përmbyt dhe u fundos. Operacionet e kërkim-shpëtimit po vijojnë si nga ajri ashtu edhe nga deti”, u shpreh ai.
Autoritetet turke kanë nisur hetimet për të zbardhur plotësisht rrethanat e ngjarjes, ndërsa operacionet për gjetjen e të mbijetuarve të tjerë vijojnë.
